राजनीति गर्ने भए पार्टी प्रवेश गर्न डा. केसीलाई आग्रह
साथै डा. गोविन्द केसीले आमरण अनसन बस्दैमा काठमाडौंमा १० वर्षसम्म मेडिकल कलेज खोल्न रोक लगाउन नसकिने प्रष्ट पारे । जनताले तिरेको करबाट तलब खाने कर्मचारीले आफ्नो काम गर्नु पर्ने भन्दै उनले राजनीतिक गर्ने भए पार्टी प्रवेश गर्न डा. केसीलाई आग्रह समेत गरेका छन् ।
प्रदेश २ को विकास निर्माणबारे छलफल गर्न नेपाल कम्युनिस्ट पार्टी (ने क पा) का सांसदहरु बालुवाटार पुगेका थिए । तर, प्रधानमन्त्री ओलीले प्रदेश २ को विकाससँगै समग्र राजनीतिक परिस्थितिबारे सांसदहरुलाई जानकारी गराएका छन् ।
कसैले भन्दैमा निषेधाज्ञा हट्दैन
प्रधानमन्त्री ओलीले उपत्यकामा जारी गरिएको निषेधाज्ञा कुनै पनि हालतमा फिर्ता नहुने बताएका छन् । दुनियाँको कुनै पनि देशमा जहाँ मन लाग्यो त्यही प्रदर्शन गर्न नपाइने भन्दै उनले भनेका छन्, ‘लोकतन्त्र भनेको छाडातन्त्र होइन ।’
सरकार निरंकुश भएको विपक्षीहरुको दाबी खण्डन गर्दै उनले आफूहरु पनि लडेर आएको भन्दै अधिनायकवादको कल्पना समेत गर्न नसकिने बताएका छन् । आफ्नो नेतृत्वको सरकार जनताबाट चुनिएर आएको भन्दै प्रधानमन्त्री ओलीले सरकारको विरोध गर्नु जनमत विपरित हुने दाबी गरेका छन् ।
काठमाडौंमा मेडिकल कलेज खोल्न रोक लगाइन्न
प्रधानमन्त्री ओलीले काठमाडौं उपत्यकामा मेडिकल कलेज खोल्न रोक लगाउन नसकिने प्रष्ट पारेका छन् ।
आमरण अनसनरत डा. केसी जनताले तिरेको करबाट तलब खाने सरकारी कर्मचारी भएको भन्दै उनले सबै आआफ्नो मर्यादामा बस्नुपर्ने बताएका छन् । सबै प्रदेशमा मेडिकल कलेज खोल्ने सरकारको सोत रहेको भन्दै उनले भने, ‘तर, एउटा व्यक्तिले भन्दैमा काठमाडौंमा मेडिकल कलेज खोल्न रोक लगाउन सकिन्न ।’
उनले राजनीति गर्ने भए राजीनामा दिएर पार्टी प्रवेश गर्न डा. केसीलाई आग्रह समेत गरेका छन् ।
कांग्रेसतर्फ लक्षित गर्दै उनले कुनै व्यक्तिलाई अगाडि सारेर मुद्दा बनाएको भरमा सरकारले स्वीकार नगर्ने बताए। साथै हिजो आफू सरकारमा हुँदा के गरिएको थियो भन्ने हेक्का राख्न पनि आग्रह गरेको सांसद सुमनराज प्याकुरेलले बताए ।
प्रधानमन्त्री ओलीले समृद्ध नेपाल, सुखी नेपाली अभियानमा अवरोध स्वीकार्य नभएको बताएको नेकपाका अर्का सांसद रामेश्वर राय यादवले जानकारी दिए ।
source: onlinekhabar
