काभ्रेपलाञ्चोक जिल्लामा हजारौं कन्याको एकसाथ पूजा गर्दै यस वर्षको कन्या पुजा आज सम्पन्न भएको छ ।
काभ्रेको बनेपाका साथै नाला, पनौती, साँगा र दाप्चालगाएतका क्षेत्रमा गरी आज १० हजारभन्दा बढी कन्या पूजिएका छन् ।
एक सय १३ बर्ष अघिदेखि सुरु भएको कन्या पूजाका लागि काभ्रेका साथै सिन्धुपाल्चोक, दोलखा, रामेछाप, काठमाडौ, भक्तपुर, ललितपुर लगायतका विभिन्न जिल्लाबाट कन्या र दर्शनार्थीहरु आउने गर्छन् ।जाति र वर्गको भेदभाव नगरी नेवार समाजमा वेलविवाह नगरिएका र अन्य समुदायका रजश्वला नभएका कन्याहरुलाई शुभको प्रतीक मानी कन्या पूजा गर्ने चलन छ । कन्या पुजा गरेमा कन्या तथा उनलाई पुजा गर्ने पनि स्वस्थ तथा निरोगी हुने मान्यता छ ।
विक्रम सम्वत १९५९ साल भाद्र कृष्ण सप्तमीको दिनदेखि सुरु भएको कन्या पुजा नेपालकै एक मात्र कन्याहरु पुज्ने पर्व हो ।
कन्याहरुलाई पुजा गर्दा निरोगी हुने, सुखसम्पत्ति पाई खुशी हुने र कन्याहरुलाई दान दक्षिणा दिनेको पनि जीवन सफल हुने धार्मिक विश्वास छ ।
