काभ्रेमा दुई गाविसमा सुख्खा पहिरो, सयभन्दा बढी घर परिवार जोखिममा

अशोक महत, जेठ १४, काभ्रेपलाञ्चोक
वैशाख १२, १३ र २९ गतेको विनाशकारी महाभूकम्प र त्यसपछिका निरन्तरका कम्पनले पोखरीनारायणस्थान र महादेवस्थान गाविसमा सुख्खा पहिरो गएको छ ।
महादेवस्थान गाविस ३ को बगुवा पाखामा सुख्खा पहिरो गएको छ । पहिरोका कारण महादेव खोल्सा र अकशीमा रहेको खेतीयोग्य जमिनलाई सुख्खा पहिरोले मरुभूमिमा परिणत गरिदिएको छ । यस्तै जमिन भासिएर पहिरो आउन थालेको भन्दै जिल्लाको पोखरीनारायणस्थान गाविसको ३ र ४ नम्बर वडाका भूकम्पपीडितलाई अन्यत्र सार्ने तयारी भएको छ । डाँडाँबाट पहिरो आउन सुरु भएपछि दुई वडाका सर्वसाधारण संकटमा परेका छन् । पहिरोबाट दुई वडाका एक सयभन्दा बढी घर परिवार जोखिममा रहेका छन् ।
केहिदिन अघि अलिअलि माटो खसेपनि स्थानीयबासीहरु त्रसित बनेका थिएनन् । तर हाल गाउँमाथिको डाँडाँबाट माटो खस्ने क्रम बढेपछि स्थानीयबासी त्रसित बन्दै गएकाले प्रहरी र नेपाली सेनाले उक्त ठाउका स्थानीयहरुलाई सुरक्षित स्थानमा सारिएको छ ।
काभ्रेका प्रमुख जिल्ला अधिकारी सुदर्शनप्रसाद ढकालले भुकम्पपछि पोखरीनाराणस्थान र महादेवस्थान गाविसको वडा नम्बर ३ र ४ पहिरोको जोखिममा रहेको बताउनुभयो । गाउँमाथिको जमिन भासिएका कारण पहिरोका जोखिम भएकोले वडा नम्बर ३ का करिब २२ परिवार गाउँ छाडेर खुल्ला स्थानमा आईसकेको बताउनुभयो ।