अशोक महत, धुलिखेल, मंसिर ११सार्कका राष्ट्रका प्रमुखहरु आराम तथा रिट्रिटका लागि काभ्रेको धुलिखेल पुगिसकेका छन् । बंगलादेशकी प्रधानमन्त्री शेखहसिना वाजेद वाहेक सार्कका ७ राष्ट्रका प्रमुखहरु सबै रिट्रिटका लागि धुलिखेल पुगेका हुन् । स्वास्थ्य खराब रहेको कारण देखाउँदै शेखहसिना धुलिखेल रिट्रिटमा सहभागी नहुभएको हो ।
रिट्रिटका लागि प्रधानमन्त्री सुशील कोइराला सबैभन्दा पहिले धुलिखेल पुग्नुभएको थियो । सार्क अध्यक्ष समेत रहनुभएका कोइराला पाहुनाहरुको स्वागत तथा रिट्रिटको प्रवन्धबारे जानकारी लिन सबैभन्दा पहिले धुलिखेल पुग्नुभएका हो ।
रिट्रिटका पाहुनाको स्वागत सरकारका सहसचिव रमेश खनाल तथा काभ्रेका प्रमुख जिल्ला अधिकारी केदार न्यौपानेले गर्नुभएको थियो ।
धुलिखेलस्थित द्धारिकाज होटलमा नास्ता खाँदै सार्क राष्ट्रका प्रमुहरुले अनौपचारिक कुराकानी गरिरहेका छन् । सार्कका पाहुनाहरुलाई होटलमा दिवाभोजको व्यवस्था पनि गरिएको छ । सार्कका राष्ट्रका प्रमुखहरुको आगमनले धुलिखेल लगायत समग्र काभ्रेका जनतामा उत्साह छाएको छ । स्थालमार्गबाट धुलिखेल पुग्ने पाहुनाहरुको स्वागतका लागि काभ्रेको साँगादेखि नै स्थानियबासीहरुले स्वतस्फुर्तरुपमा गाग्रीमा फुलका गच्छासहितका घडा राखेका छन् ।
भारतीय प्रधानमन्त्री नरेन्द्र मोदीले धुलिखेल जान आफ्नै हेलिकोप्टर प्रयोग गर्नुभएको छ भने, अन्य सार्कका प्रमुखहरुले भने सरकारले व्यवस्था गरेको हेलिकोप्टरबाट धुलिखेल पुग्नुभएको हो ।
काभ्रेको धुलिखेलमा सार्कको पाहुनाको सुरक्षा जिम्मा सेनालाई दिइएको छ । धुलिखेल र भक्तपुरमा सुरक्षा व्यवस्था निकै कडा पारिएको छ । सेनाले हवाइ गस्ती गरिरहेको छ । अरनिको र बीपी राजमार्गमा सवारीका साधन सन्चालनमा रोक लगाइएको छ ।
धुलिखेल हिडेका सार्क सदस्य राष्ट्र प्रमुख लगायतका भीभीआईपीहरु धुलिखेल रिट्रिटपछि दिउँसो २ बजे काठमाडौ फर्किएर सार्क सम्मेलन समापन कार्यक्रममा सहभागी हुने छन् । धुलिखेलमा सार्क राष्ट्रका विदेश सचिवहरु, विदेश मन्त्रीहरुका पनि उपस्थिती रहेको छ ।
स्वदेशी तथा विदेशी सन्चारकर्मीहरुलाई सार्कका विशिष्ट पाहुनाहरुले दिवाभोज गर्ने होटल भन्दा परै राखिएको छ । सन्चारकर्मीहरु अर्को एक छुट्टै होटलको छतमा बसेर समाचार संप्रेशण गरिरहेका छन् ।
अठारौं सार्क शिखर सम्मेलन समापन लगत्तै भारत र पाकिस्तानका प्रधानमन्त्री आजैै स्वदेश फर्किनुहुने जानकारी गराईएको छ ।
पाकिस्तानी दूतावासका एक अधिकारीका अनुसार प्रधानमन्त्री नवाज सरिफ आजै इस्लामावाद फकिर्ने भएका छन् ।
त्यस्तै भारतीय प्रधानमन्त्री नरेन्द्र मोदी पनि आज राति नै भारत फर्किनुहुने भएको छ ।
स्वदेश फकिर्नुअघि दुबै प्रधानमन्त्री नेपालका राष्ट्रपति डा.रामवरण यादवले आयोजना गरेको रात्रीभोजमा सहभागी हुनुहुनेछ ।
