अशोक महत, धुलिखेलकाभ्रेपलाञ्चोक जिलाको बनेपा नगरपालिका बुडोल–११ स्थित रातमाटेमा रहेको पाँचखाल कोल्ड स्टोरमा राखिएको ४४ हजार बोरा आलुको बीउ रोप्न नमिल्ने गरी बिग्रिएको छ । मंसिरमा रोप्न चैतमा उक्त कोल्ड स्टोरमा राखिएको आलुको बीउ रोप्नै नमिल्ने गरी कोल्ड स्टोरभित्रै उम्रिएको हो ।
कोल्ड स्टोरको लापरबाहिका कारण बीउ उम्रिएको भन्दै पाँचखाल, रविओपी, नाला र बनेपा क्षेत्रका किसानहरुले उचित क्षतिपूर्तिको माग गर्दै आज जिल्ला प्रशासन कार्यालयमा धर्ना दिएका थिए ।
मंसिरमा रोप्नको लागि राखिएको आलु ४ महिना अगाडि नै कोल्ड स्टोरमा नै उम्रिएर बीउ नै बिग्रेपछि क्षतिपूर्तिको माग गरी कार्यालय घेराउ गरेको पिडित कृषकहरुले बताएका छन् ।
एमोनिया ग्याँस चुहिदा आलुको बीउ उम्रिएको कोल्ड स्टोर सञ्चालक बद्री श्रेष्ठले जानकारी दिनुभयो । कोल्ड स्टोरमा कृषकहरुले ४४ हजार बोरा बीउ बिग्रिएको बताए पनि श्रेष्ठले भने २१ हजार बोरा मात्र बिग्रिएको दाबी गर्नुभएको छ ।
कृषकहरुले आफुहरुको कोल्ड स्टोरमा राखिएको आलुको साथै प्रतिबोरा २ हजार ५ सय र कोल्ड स्टोर शुल्क मिनाहा हुनुपर्ने माग राखेका छन् । उता, कृषकको मागअनुसार क्षतिको विवरण ११ करोड हुन आउने भएकोले स्टोरले त्यती धेरै क्षतिपूर्ति दिन नसक्ने श्रेष्ठले बताउनुभएको छ ।
