असार १३, काठमाडौँ । अन्तिम खेलमा जीत निकाल्दै अर्जेन्टिना नकआउट चरणमा पुुगेको छ । यो खेलअघिसम्म समूहको अन्तिममा रहेको अर्जेन्टिनाले नाइजेरियालाई २–१ ले पराजित गर्दै उपविजेताका रुपमा अघिल्लो चरणमा पुुगेको हो ।
अर्जेन्टिनाको जीतमा कप्तान लियो मेसी र मार्को रोजोले गोल गरे । खेलको १४ औं मिनेटमा मेसीले गोल गर्दै अग्रता दिलाएपनि पेनाल्टि पाएपछि नाइजेरियाले गोल फर्काएको थियो । मास्चेरानोले नाइजेरियाका खेलाडीलाई डिबक्समा लडाएपछि मोसेसले पेनाल्टीमा गोल गरे ।
तर मार्को रोजोले ८६औं मिनेटमा गोल गर्दै अर्जेन्टिनाको संकट टारेका हुन्। अर्जेन्टिनाको जीतमा क्रोयसिया समेत सहयोगी बन्यो । उसले आइसल्याण्डलाई हराएपछि अर्जेन्टिनाको अघिल्लो चरण थप सहज भएको हो ।
क्रोयसियाका लागि खेलको ५३ औं मिनेटमा मिलन बडेजले गोल गरे । तर ७६औं मिनेटमा पेनाल्टि पाएपछि आइसल्याण्डले बराबरी गरेको थियो । गिल्फी सिग्युर्डसनले गोल गरे । ९० औं मिनेटमा गोल थप्दै इभान पेरिजले क्रोयसियालाई जित दिलाए ।
अब नकआउट चरणमा अर्जेन्टिनाले फ्रान्स र क्रोयसियाले डेनमार्कसँग खेल्नेछ ।
