साउन २५, काठमाडौँ । युरोपियन च्याम्पियन रियल मड्रिडले चेल्सीका गोलरक्षक थिबाउट कोउर्तोइसलाई भित्र्याएको छ ।
रुसमा भएको विश्वकपमा सर्वोत्कृष्ट गोलरक्षक बन्दै गोल्डेन ग्लोभ अवार्ड जितेका बेल्जियन थिबाउटले रियल मड्रिडसँग ६ वर्षको सम्झौता गरेका हुन् ।
२६ वर्षे थिबाउटले चेल्सीमा सात वर्षको बसाई टुंग्याउँदै स्पेनिस राजधानीलाई आफ्नो नयाँ गन्तव्य बनाएका हुन् । रियल मिड्रडले क्लबका अध्यक्ष फ्लोरेन्टिनो परेज र थिबाउटले सम्झौतामा हस्ताक्षर गर्दै गरेको भिडियो क्लिप जारी गरेको छ ।
अहिलेसम्म कति मूल्यमा थिबाउटलाई भित्र्याएको भन्ने खुलेको छैन । तर ३५ मिलियन पाउण्ड भन्दा बढीको डिल रहेको अनुमान छ ।
चेल्सीले एथ्लेटिको बिल्बाओका २३ वर्षे किपा एर्रिजाबालागालाई ७१ मिलियन पाउण्डमा भित्र्याएको भोलिपल्टै थिबाउटले रियल मड्रिडसँग सम्झौता गरेका हुन् ।
