७० मिनेटपछि १० खेलाडिमा सिमित भुटानविरुद्ध प्राप्त यो जितपछि नेपालले सेमिफाइनल पुग्ने सम्भावना कायमै राखेको छ। नेपाल पहिलो खेलमा पाकिस्तानसँग २-१ गोलले पराजित भएको थियो।
नेपालले तेस्रो तथा अन्तिम खेलमा बंगलादेशसँग खेल्ने छ। नेपालको जितमा भरत खवास, सुनिल बल, निराजन खड्का र अनन्त तामाङले गोल गरे। निराजन र भरत दोस्रो हाफमा मैदान छिरेका थिए।
नेपालका रक्षक अनन्तले २२ औं मिनेटमा पहिलो गोल गरे। सुनिल बलले गरेको कर्नर प्रहारमा तामाङले सिक्सयार्ड सर्कलबाट हेडमार्फत गोल गरेका थिए। ७१ औं मिनेटमा सुनिल बलले अग्रता दोब्बर बनाए।
भरतले ७९ औं मिनेटमा गोल थपे। उनले एकल प्रयाशमा गोल गरे। केही मिनेट अघिमात्र उनी अन्जन विष्टको मैदानमा मैदान छिरेका थिए। ८८ औं मिनेटमा निराजन खड्काले गोल गरेका थिए। उनले सुनिल बलको कर्नर प्रहारमा हेडमार्फत गोल गरे। निराजन ६ वर्षपछि राष्ट्रिय टोलीमा फर्किएका हुन्।
